طفل في السابعة من عمره يكتب موضوع انشاء عن الزواج

موضوع انشاء عن "الزواج"

انا كلما سويت شغلة زينة ..أمي تقول لي راح ادور لك على عروس زينة وحلوة اذا كبرت، وانا لغاية الحين سويت خمس اشياء زينة ، وكل مرة تقول لي وصف غير عن العروس...يعني لغاية الحين امي وعدتني انها تزوجني خمس نسوان بس انا افكر ان الانسان لازم يتزوج عشان يصير بني آدم لان الزواج مسؤولية،لان ابوي دايماً يقول ان الانسان لما يواجه المسؤليات يصير آدمي .وفي الزواج التفاحم بين الطرفين وايد مهم ، يحني لازم يليقون لبعض ، مثلي أنا وبنت خالتي مريوم وايد لايقين على بعض من ناهية الفكر يعني مخنا مثل بعض، اهي تحب سبيس تون و ام بي سي ثري وانا بعد احب سبيس تون وام بي سي ثري بس هي صغيرة الحين عمرها 5 سنين وانا عمري سبع سنين ، امي احيانا تقول لي مريوم مخها أكبر من مخك ، وهذا الكلام خلاني أكلمها هذاك اليوم وقلتلها اني ابي اتزوجك وهي وافقت . في الزواج العمر مب مهم لان في وايد ناس كبار تطلقوا لانهم مايعرفون يتفاهمون مثل الكبار ، وفي وايد ناس صغار ماوصلوا للطلاق للحين. المهم ان يكون في حب بينهم .لان الحب شيء محم وايد لو في حب ماكانت المرة طلبت مهر وبيت وسيارة ، مثل خالي مرته في بيت اهلها عشان ماجاب لها سيارة ، وانا تعلمت من تجربة خالي ومن الحين قاعد اجمع فلوس العيدية عشان اشتري سيارة حق مريوم بنت خالتي وانا وهي سعداء ومتفاحمين ان البيت والسيارة والمهر ماتجيب السعادة والعرس لازم يكون بسيط ..لان ليلة عرس خالي صار خلاف بينه وبين عمه على الزينة والزفة لانهم كانوا يبون ورود طبيهية على الكوشة بس خالي كان جايب ورود صناهية وام العروس تصارخ وجدتي تصارخ ... بس في النحاية تفاحموا بعدين طبعاً أنا ومريوم اتفقنا ان العرس يكون بسيط وما نجيب وايد زينة ووايد أكل بس بنوزع جيبس وعصير ...لان الجيبس والعصير احلى من كل شي ،لان لما ناكل جيبس يطلع صوت في فمنا يقول "خش خش خش" . والواحد لازم يختار بنت تعرف في التدبير المنزلي ، والا راح ينجبر يشتري منزل جديد والمنازل غالية والايجارات غالية . وانا فكرت في البيت من الحين وسويت بيت على الشجرة حق مريوم ، بس مريوم طاحت من على الشجرة وانكسرت ايدها ، وخالتي زعلت مني .. بس انا ماخفت انها ماتزوجني مريوم لان اللي يزعل بيرضة بعد كم يوم .
هذا موضوعي الانشاء